தலைமைப் பண்பு என்பது ஒவ்வொரு மனிதனுக்கும் தேவையானது. பலரும் நினைப்பது போன்று அது பெரும் நிர்வாகிக்கும், தலைவருக்கும் உரியது மட்டுமல்ல. ஏனெனில் தலைமைப் பண்பை முடிவெடுப்பது, செயல்படுத்துவது என்ற கோணத்தில் பார்க்கலாம்.
ஒரு குழந்தை வளர்கிறது, படிக்கும்பொழுது இந்தப்படிப்பு தனக்கு சரி வரும் என்று படிப்பை தேர்ந்தெடுக்கிறது, பள்ளிப் படிப்பிற்கு பின் எதிர்காலம் குறிப்பிட்ட துறையில் தான் இருக்க வேண்டும் என தனக்கான எதிர்காலத்தை தேர்ந்தெடுக்கிறான், தனக்கான வேலையை கண்டுபிடிக்கின்றான், துணையை தேர்ந்தெடுத்தவுடன், இந்த உலகம் அவனுக்கு குடும்பத்தலைவன்/ தலைவி என்ற பட்டத்தை வழங்குகிறது, தனது குழந்தைகளுக்கு நல்வழி காட்டும் பொறுப்புள்ளவனாகிறான். சமூகத்திற்கு தேவையானவற்றை பிறரோடு இணைந்து கேட்டுப்பெறும் அக்கறையுள்ளவனாகிறான்.
இப்படி பல பொறுப்புகளை ஒவ்வொரு மனிதனும் கடந்து வரும்பொழுது, நமக்கு, நம்மோடு உள்ளவர்களுக்கு நல்வழி காட்டும் பொறுப்பும், பின்னால் வருகிறவர்களுக்கு சரியான வழியை காட்டும் வழிகாட்டியாகவும் இருக்ககூடிய நம் அனைவருக்கும் தலைமைப்பண்பு அவசியமானதாகிறது. அப்படிப்பட்ட தலைமைப் பண்பை வளர்ப்பதற்கு நாம் எந்த அளவுக்கு முக்கியத்துவம் கொடுக்கிறோம்.
தலைமைப் பண்பு என்றவுடன், அதற்கும் நமக்கும் சம்பந்தமில்லை என்று ஒதுங்கி விடுகின்றோம். அதே நேரம் தலைமைப் பண்புகள் சிறந்து விளங்கும் நபர் கிடைக்கும் வாய்ப்புகளைப் பயன்படுத்தி வாழ்க்கையில் உயர்வை அடைகிறார். தலைமைப் பண்பை வளைர்க்காமல் தலைமைப் பொறுப்பை அடைந்த ஒரு சிலரும் அந்தத் திறனை மெருகேற்றாததன் விளைவாக நிர்வாகத்தில் தோல்வியை சந்திக்கின்றனர். அப்படிப்பட்ட அவசியமான தலைமைப் பண்பிற்கு தேவையான தகுதிகள் என்ன?
தொடர்ந்து செயல்படுங்கள்
இந்த உலகத்தில் வெற்றி பெற வேண்டுமென்றால் தொடர்ந்து இயங்கிக்கொண்டிருத்தல் அவசியமாக இருக்கிறது. புதுப்புது தொழில்நுட்பங்களும், தொழில்முறைகளும், துறை சார்ந்த உட்பிரிவுகளும் தொடர்ந்து அறிமுகமாகிக்கொண்டே இருக்கின்றன. நாம் அவை பற்றி அக்கறை கொள்ளாமல் இருந்தால், நாம் பின் தங்கியவர்களாகி விடுவோம்.
எனவே ஒவ்வொரு நாளும் கற்றுக்கொள்ளுதல் என்பது அவசியமானதாகி விடுகிறது. தலைமைப் பொறுப்பில் இருப்பவர்கள், தன்னுடன் இணைந்து பணியாற்றும் சக ஊழியர்கள் சோர்வின்றியும், கால விரயமின்றியும் வேலைத்திட்டங்களை விரைவாகவும், பிழைகளின்றியும் முடிப்பதற்கு அவ்வவ்பொழுது வரக்கூடிய எளிதான முறைகளை அறிந்து, அதனை பிற ஊழியர்களுக்கும் பயிற்சி அளித்து வேலைகளை முடிக்கவேண்டும்.
சக ஊழியர்கள், தொடர்ச்சியான செயல்பாட்டினால் சலிப்படைவது வெற்றிக்கான பயணம் மெதுவாக செல்வதற்கு வழி வகுக்கும். எனவே அவர்களுக்கு உற்சாகம் அளிக்கும் வகையில் அலுவலக நடைமுறைகள் எளிதானதாக இருக்க வேண்டும். அவர்களுக்கு நடைமுறைகளை எளிமைப்படுத்த வேண்டுமென்றால் நாம் அவற்றை அறிந்திருக்க வேண்டும்.
ஆகையால் நாம் உயர் பதவியில் இருக்கிறோம் என்பதற்காக முடிவுகள் எடுப்பதில் மட்டும் கவனம் செலுத்தக்கூடாது. நிறுவனம் சம்பந்தப்பட்ட அனைத்து துறைகளின் செயல்களை தெரிந்து வைத்திருக்க வேண்டும். எந்த அளவுக்கு நம்மிடம் தகவல்கள் இருக்கிறதோ, அதற்கேற்ற வகையில்தான் நமது செயல்படுதலின் வேகமும் இருக்கும். எனவே தலைமைப் பொறுப்பை விரும்புபவர்கள் பலதரப்பட்ட செய்திகளையும் அறிந்து, அதில் தெளிந்து புதிய அறிமுகங்களை தொடர்ந்து செயல்படுத்துவது தலைமைப் பண்பின் அடையாளம்.
கண்டுபிடியுங்கள்
ஒவ்வொருவரிடமும் தனித்திறமை இருக்கும். ஒரு நபர் செய்யும் வேலைக்கும், அவரிடம் உள்ள திறமைக்கும் சம்பந்தமிருக்காது. குறிப்பிட்ட நபரிடம் இருக்கும் திறமையை கண்டறிந்து, அதனை தன்னுடைய நிறுவனத்தின் வளர்ச்சிக்கு எப்படி பயன்படுத்தலாம் என ஆராய வேண்டும். நிறுவனத்தின் தனிப்பட்ட நிகழ்வுகளிலோ அல்லது முக்கியமான நெருக்கடி காலகட்டங்களிலோ அவர்களின் தேவைகள் பயன்படும். அதோடு மட்டுமல்லாமல் நிறுவனத்தின் தேவைகள் என்ன? அவை வெளியில் இருந்து கொண்டு வரப்பட வேண்டுமா? அல்லது நம்மிடமே இருக்கிறதா என்பதை கண்டறிய வேண்டும். தான் மட்டுமே சிந்திக்காமல், நிறுவனத்தின் பல மட்ட தொழிலாளர்களின் சிந்தனைத்திறனையும் அக்கறையோடு கண்டுகொள்ள முயற்சிக்க வேண்டும்.
புதிய வேகத்தில் செல்ல சரியான இலக்குகளை கண்டுகொள்ள வேண்டும். பொருள் உற்பத்தித்துறையாக இருந்தால், பொருளின் வடிவமைப்பு, உபயோகத்தில் என்ன மாற்றங்களை கொண்டு வந்தால் சிறப்பாக இருக்கும் என ஆராயலாம். நிர்வாகத்துறையாக இருந்தால் எந்த வேலைக்கு எந்த நபரை தேர்ந்தெடுக்கலாம் என தீர்மானிக்கலாம்.
வெற்றி
ஒரு பெரிய பொறுப்பு நமக்கு கொடுக்கப்பட்டிருக்கிறது என்றால், அந்த பொறுப்பை வெற்றிகரமாக நிறைவேற்றுவதற்காகத்தானே தவிர, தோல்வி அடையச் செய்து நிலைகுலைய செய்வதற்காக அல்ல. பெரும் மனித வளமும், பொருளாதார காரணிகளும் நம்மை, நம் முடிவுகளை வைத்தே இயங்குகிறது என்பதை, நாம் எடுக்கும் ஒவ்வொரு முடிவுகளின் போதும் உணர்ந்திருக்க வேண்டும். தோல்வியை எவரும் விரும்புவதுமில்லை, அதுவும் தனி மனித தோல்வியை விட நிர்வாகத்தின் தோல்வி என்பது, வேலை பார்க்கும் நபர்கள், நிறுவனத்தின் கட்டமைப்பு, பொருளாதார நிலை, எதிர்கால இலக்குகள் என முழு நிறுவனத்தையும் காயப்படுத்திவிடும்.
முடிவெடுப்பது என்பது ஒரு நொடியில் எடுப்பது அல்ல. நீண்ட ஆய்வு, சரியான திட்டமிடல், தொலைநோக்கு பார்வை, தேவைகள், நிதி நிலைமை, பயன்கள், விளைவுகள், பிரச்சனைகள் என்று பல்வேறு கோணங்களில் சிந்தித்து முடிவெடுக்க வேண்டும். வெற்றியை விட தோல்விக்குத்தான் நாம் அதிகம் பொறுப்பேற்க வேண்டியிருக்கும் என்பது தான் உண்மை. தோல்வி எளிது. வெற்றி கடினம். வெற்றிதான் நமக்கு அங்கீகாரத்தைப் பெற்றுத்தரும். வெற்றியைத்தான் நம்மிடம் நிறுவனமும் எதிர்பார்க்கிறது. தயக்கத்தை விட, தன்னம்பிக்கையோடு முடிவெடுத்தால், நாம் தோல்வி அடைந்தாலும், நம்மை திரும்பவும் எழச்செய்வதற்கான உற்சாகத்தைத் தரும்.
பொறுப்புகளைப் பெறுங்கள்
தொடர்ச்சியான பயிற்சியும், கற்றலும், அனுபவங்களின் மூலம் தெரிந்து கொண்டதும், தன்னம்பிக்கையும் எல்லாவற்றிற்கும் மேலாக பொறுப்பேற்றலும் நம்மை தலைமைக்குரிய பாதையில் பயணிக்கச் செய்யக்கூடிய காரணிகள். படிக்கும் காலத்திலேயே பள்ளி, கல்லூரி மற்றும் சமுதாய அளவில் சிறு சிறு பொறுப்புகளைப் பெற்று செயல்பட ஆரம்பித்தோமானால், வேலைக்குச் செல்லும் பொழுது நம்மிடம் தயக்கம் இருக்காது, அதற்கு பதில் சாதிக்கத் துடிக்கும் உற்சாகம் இருக்கும்.
கல்வி மலர்
